口罩小姐三甲重聚影「全家福」 浩南笑阿姨老土

2021年05月06日 12:32
東網電視
更多新聞短片
Re-U!
「口罩小姐」冠、亞、季軍「浩南」鄭伊琪(Wayii)、「阿姨」徐蒨寧同「細細粒」馮寶欣最近影「全家福」嚟個三甲Re-U,分別影咗兩輯相,白Tee襯長牛仔褲就行Casual Look,而全黑連身裙就玩型格。浩南受訪嗰陣話促成今次影相係全因阿姨︰「我哋阿姨就係老土守舊,哈哈!話難得贏咗獎就梗係要影番輯相,佢份人真係好傳統,佢自己都自認㗎!仲反問我人生有幾多次選美。」佢再話呢次影相係完咗比賽之後嘅一、兩個星期,一見面發現大家嘅身材都冇乜點走樣,而另一樣嘢令佢期待嘅就係可以畀阿姨化妝︰「去之前都有問佢會唔會幫我化妝,因為佢係化妝師嚟,平時見到佢個妝都好靚,嗰日佢就幫我化咗眼妝。」問到有咩拍攝趣事?佢就話當日好快就影完,而原定有一Part係齊齊帶綵帶影相,不過最終因為佢同細細粒唔記得咗帶,所以拍唔成。
「號召人」阿姨話今次影相係實現到佢嘅願望︰「一直都想一齊影一次,覺得好特別,我哋3個人感覺似係一Team人,但完全唔同性格,其實當初第一眼見到浩南嗰陣就被佢Charm到,覺得佢一定會入圍。」至於細細粒就指今次最深印象係着黑裙影嘅嗰輯相︰「初頭擺啲好型嘅Pose,但到後尾係變咗影啲搞笑、傾吓偈嘅相,大家個表情係好開心,成件事係好融洽。特別浩南會私人醒咗好多拍攝技巧畀我,呢方面佢好有經驗,完全知道攝影師係要攞啲咩角度。」問到3人之後可有機會一齊再做嘢?Wayii即大爆有機會︰「但未完全落實,自己都好期待!」