【黃樹棠出殯】黃榮璋讚父親樂天:病住都日日打機

20210506
東網電視
更多新聞短片
在亞視經典劇集《我和殭屍有個約會》中飾演「求叔」的資深藝人黃樹棠上月因癌病逝世,享年74歲。今日於紅磡世界殯儀館出殯,靈柩舁送到鑽石山火葬場,資深配音員丁羽前來送別故友。
黃樹棠胞妹黃文慧與兒子黃榮璋接受訪問,黃文慧心情比昨日平復得多:「棠哥走得安詳,我就更加離苦得樂。」黃榮璋說:「依家有少少事勾起都會唔開心,都要一排先可以復元,但係見佢離開唔辛苦,都戥佢開心。(爸爸有冇叫你積極做人?)佢由細到大都好放縱我,做乜都支持,所以都冇擔心我,生活到就可以。不過,我哋一齊住咗好耐,好似兩兄弟咁,所以好似失去咗個爸爸同兄弟咁。(尹天照話原本同棠哥拍網絡電影?)佢其實好多工作安排咗,本身有2部戲,越南亦接咗部電影,但係1月發現肺癌,惡化得好快,佢都唔開心,有好多工作就病,我安慰佢好番再做,佢都放低咗好好去醫病,不過結果係咁。(有咩嘢要幫爸爸做?)綠色殮葬,上年佢大腸癌之後都諗會唔會突然走,如果走咗後生都唔會成日嚟拜祭,叫我一定要將佢(骨灰)灑喺紀念公園,今年新年都講要綠色殮葬,呢樣我一定要做到。(棠哥諗法新潮?)冇話新潮,做呢行係與時並進,我都佩服佢每日都仲喺度打緊機。(燒部遊戲機畀佢?)佢去環遊世界啦,其實屋企部遊戲機都係佢買,我都係搭單玩。」