張雨綺孖小鮮肉男友冧豬放狗　畀人認出即閃

33歲內地女星張雨綺最近被踢爆同「95後小鮮肉」、小提琴手李柄熹暗撻，二人愛得甜蜜，早兩日更被網友偶遇拍拖放狗，雖然表現親民，但網友形容張雨綺被認出後即整理口罩後急急走人。

有網友晒出兩張照片，指自己放狗時偶遇張雨綺，稱張雨綺當時同樣放狗，兩人嘅愛犬因為係同品種，張雨綺更出手摸網友隻狗，被大讚超級溫柔。身穿碎花裙搭配衞衣嘅佢，戴帽又戴口罩，心情靚靚，而佢身邊就有一位着黑色潮服、拖狗繩嘅男仔，疑似係佢緋聞男友李柄熹。不過網友續指張雨綺似乎唔想畀人認得，發現路人討論自己時，就立刻拉好口罩並與男友並肩走人。