【女都生埋】杜淳花藏戒指向老婆求婚　網民反應兩極

內地男星杜淳，今年1月1日宣布同「美貌如楊冪般」嘅花店老闆娘王燦領證結婚，王燦上個月仲為老公誕下可愛B女，幾咁溫馨！近日兩口子上內地節目《婆婆和媽媽》時，杜淳特意為老婆製造驚喜，先係安排一頓燭光晚餐，跟住向老婆邀功話啲花係佢插嘅，特地挑選最大嘅花送畀老婆，又話呢朵花氣味好特別，王燦喺聞花香之際就發現一枚鑽戒，杜淳立即下跪，話要完成一個未完成嘅求婚儀式，搞到王燦即時感觸落淚，正如佢哋所講幾時求婚唔重要，重要係「永遠的陪伴」，令唔少網民動容，不過亦有人話只係節目效果，佢哋連女都生埋，擺明吸引人注意上熱搜榜啦！