10個月冇見媽咪！謝嘉怡秘返蘇格蘭送上母親節最大驚喜

港姐冠軍謝嘉怡向來侍母至孝，喺蘇格蘭長大嘅佢自選完港姐後，足足已經有10個月冇見媽咪，嚟緊星期日就係母親節，嘉怡即送上驚喜，秘密飛返蘇格蘭嘅佢，仲喺社交網Post短片，紀錄呢個令人感動嘅時刻。見片中謝媽媽喺廚房做緊嘢，嘉怡突然出現，謝媽媽見個女出現眼前，簡直唔可以相信自己眼睛，兩母女然後即深情擁抱，攬咗差唔多成半分鐘都唔放，真係盡在不言中！嘉怡仲留言：「我終於返屋企喇！」好多網民都話佢好乖，呢份母親節禮物真係好Surprise！