湯洛雯唔捨得生日之旅過得快！馬國明自爆陪慶生

無綫花旦湯洛雯（靚湯）前日34歲生日，就去咗一個令佢印象難忘嘅Staycation，一班好閨蜜同佢慶生之餘，網民仲發現湯洛雯所坐嘅梳化，同馬國明晒嘅公仔照片係一模一樣，換句話說佢哋好有可能係孖住一齊慶祝呢個浪漫生日。不過開心嘅時間過得特別快，靚湯係時候同Staycation講拜拜，佢再喺社交網大晒多張喺酒店嘅獨照，仲用英文留言：「我已經好掛住呢幾日！」而馬國明更蒲頭，留下哈哈笑加上心心嘅Emoji！唔少網民群起留言，話啲靚相一定係馬國明視角，由佢操刀影相，仲問佢哋有冇乘機造人添！