行12粒鐘山完全冇疲態！朱智賢晨早着小背心行沙灘勁精神

無綫小花朱智賢已走出偷食事件陰霾，積極繼續發展自己嘅星途，尋日佢仲為無綫J2節目《野外步出2》拍攝，行山由白晝行到天黑，足足行咗12粒鐘，難怪佢話想唔攰都唔得。點知經過一晚叉電，佢當堂精神晒，仲喺社交網晒佢着住小背心行沙灘嘅相，佢留言：「本身尋日行咗12個鐘山，真係覺得好攰，個人散晒，今朝出奇地又可以早起，一去到沙灘成個人醒神晒！」唔少網民都話佢修心養性後，成日做運動，身體好，體力當然好快回復啦！