鄧健泓47歲生日要二人世界　自嘲「生不逢時」

藝人鄧健泓（Patrick）5月6日47歲生日，獲太太石詠莉製造「二人世界」放閃，且於社交網留言：「My Super Hero, Happy Birthday,老公大人 I love you」。談到今次是對方第8度為自己慶生，Patrick冧爆表示：「嗰日佢係咁喺我面前唱歌跳舞，又買咗個我最鍾意食嘅杧果蛋榚。我份人比較低調，唔想一班人慶祝，咁樣已經足夠喇。（最難忘係邊個生日？）3年前佢買咗兩個figure畀我做禮物，因為係我嘅至愛。」

Patrick又打趣自己「生不逢時」：「因為基本上5月比較多工作，通常會要有新歌派台，好似去年呢個時候，我就幫李居明拍咗首歌，所以計計吓差唔多年年都留喺屋企過生日，反而太太生日我哋會去日本同泰國等地玩，佢嘅生日比較多姿多采囉！」