母親節靚相Battle　陳凱琳陳茵媺出Post夠專業

母親節歌頌母愛偉大，喺現今社會出Post賀母親節快樂仲緊要過送禮物，所謂物輕情義重，仔女心意固然重要，原來依家仲要有媽媽之間嘅暗地Battle！就好似已為二子之母嘅陳凱琳咁，佢一向愛搵專業攝影師幫自己影低一輯又一輯嘅家庭樂合照，今次佢為母親節就舉家去沙灘玩，拉埋老公鄭嘉穎一齊湊仔，佢自己就同兩個仔襯晒母子裝，靚相又出爐！

冇搵攝影師幫手嘅陳茵媺，就決定自己話事自己影，成家去咗Staycation嘅佢，就晒出溫馨度爆燈嘅「床照」，一張係佢自己好梳乎咁自己起床，一張就係仔女蜂擁而上攬實媽咪嘅合照，創意度滿分。

第一年以媽媽身份過母親節嘅周勵淇，就行「奇招」晒畀阿仔伸一腳嘅自拍，雖然畫質同構圖冇得比，不過佢就行貼地一面，自爆冇收花、冇蛋糕，只有收到一隻腳，真係窩心又搞笑。

而同樣都係媽媽嘅楊茜堯就變番小朋友咁，同自己媽咪去主題樂園玩，拎住泡泡機嘅佢同媽媽頭貼頭，個開心樣成個大細路咁，充滿童真。鍾嘉欣則多謝媽咪之餘，亦出Post多謝奶奶。