范丞丞孝順帶父母出巡　粉絲烏龍認錯范爸爸係偶像

范冰冰細佬范丞丞係當紅偶像，去到邊都會畀大批粉絲圍住。四圍飛嘅佢近日就被影到現身機場，坐住私家車趕飛機嘅佢，原來仲做孝順仔帶埋媽咪現身，唔少粉絲見到Auntie落車就已經開始尖叫，之後再見到長腿男神落車，搞到粉絲失控狂嗌范丞丞，點知原來大家擺晒烏龍，落車嘅原來係范丞丞老竇范濤！

仲未知嗌錯人嘅粉絲，一見到最後落車嘅范丞丞探頭同大家打招呼，佢哋先知搞錯晒，現場即傳嚟一片爆笑聲，事後粉絲仲狂讚Uncle高大又有型，真係會好易認錯。