麥秋成冇脾氣！湯怡預料做嚴母：我一定係做醜人

英皇小花湯怡近日同時「升呢」做人妻兼準人母，回想起老公麥秋成首次稱呼自己做「麥太」時一臉冧爆︰「係喺我哋交換完戒指嘅時候，佢叫咗我一聲『麥太』，嗰陣我都未Load到，因為估唔到佢會咁講，依家身邊啲人都係咁叫我，係有另一份嘅甜蜜，不過我都係鍾意叫佢全名，只係如果我叫佢做『麥生』就應該有大事發生！」

問到是否開始添置BB用品？她笑話暫時都未破戒，仍然忍到手︰「家姐話起碼7個月先好睇，但我相信一開始睇就好大鑊，買起嘢上嚟都好盡！亦都有好多朋友話會畀物資我哋，BB大得快，咁都環保啲。」打趣問到將來會是嚴母抑或慈母？她即大笑答︰「我一定係做醜人嗰個，因為麥秋成佢冇脾氣！總之我會賞罰分明，畀佢知道咩係啱、咩係唔啱，家姐有2個小朋友，所以我都有啲湊B心得。」