孖孟瑤玩火辣一字馬　張嘉兒傳授岑杏賢佗B心得

藝人張嘉兒、孟瑤、陳爽及張美妮4位人妻今晚現身無綫節目《開心大綜藝》，以「辣妻團」姿態壓軸上陣，「隊服」清一色是閃石戰衣配超短熱褲，露腰騷腿，勁歌熱舞，非常吸睛，當中嘉兒及孟瑤更施展火辣版「凌空一字馬」，「舞功」強勁，完成演出後，還獲仔女們上台送禮物，場面溫馨。

表演前嘉兒坦言緊張，事關一向沒有跳舞底子的她只得5日綵排，又驚甩拍子，今次絕對是強化心靈的訓練，幸而獲老公專程帶囡囡現身捧場打氣 ，令她相當窩心。

談到好友岑杏賢趁母親節宣布懷孕5個月，嘉兒坦言：「作為好朋友，我梗係一早知啦，但要幫佢保守秘密，等佢一切穩定先。（傳授佗B心得？）有呀，我同老公約咗佢，以及佢老公出嚟，畀咗好多資料佢，好戥佢開心。（佢身體狀況點？）好好呀，身材仲好弗，之前有孕吐嘅，依家ok嘅。」她笑言老友懷孕，搞到自己心郁郁想生第3個：「不過我又想留番啲時間畀老公，依家考慮緊。（老公呢？）佢都係交畀我話事。（收到咩母親節禮物？）老公提前送咗花，囡囡畫咗啲嘢畀我，我叫佢哋唔好嘥錢。」

另外，離了婚的孟瑤原來已覓得第2春，男友是在港生活的內地商人，戀人關係已有1年，感情漸見穩定，但暫時未有再婚打算。問到囝囝情況，她答：「喺北京返緊學。我舊年淨係隔離都4次，幾乎搞到有抑鬱症。」