成世唔再「起霧」　吳業坤做植入式隱形眼鏡手術

歌手吳業坤喺2015年度嘅《勁歌金曲頒獎典禮》上勇奪「最受歡迎新人獎金獎」一晚成名，激動獻唱《陽光點的歌》時，情緒大爆發喊到眼鏡「起霧」，呢幅「起霧圖」一度成為經典。不過大家可能再唔會見到坤坤「起霧」，皆因佢決定咗同「近視眼」分手，花咗成10萬蚊去做植入隱形眼鏡手術，佢喺網上留言話：「25年前第一次戴眼鏡，11年前第一次戴隱形眼鏡。」之後就上載做完手術嘅「獨眼龍」相，又話：「做完植入式隱形眼鏡（手術），番（返）嚟覆診，準備解封埋另一隻眼。」

大部分粉絲都恭喜佢脫離「四眼仔」一族，以後睇嘢可以好清晰，不過亦有網民留言話唔捨得佢副眼鏡：「戴眼鏡先係佢icon喎」、「我覺得佢戴眼鏡靚仔啲」。吳業坤接受訪問時表示：「我做嗰個手術係植入式，加咗啲晶體入去，都幾勇敢。」問到康復進度，佢話：「每個人唔同嘅，我需要啲時間適應，依家唔戴眼鏡都得，但會繼續keep住戴平光眼鏡保護對眼先，同埋習慣自己個樣，都要慢慢適應擺咗異物入對眼度。」