流埋兩行鼻涕!陳瀅兩場喊戲感動網民 演技獲激讚

2021年05月11日 13:02
東網電視
更多新聞短片
Model出身嘅陳瀅近年喺演戲上不斷有新嘗試,早前喺《愛美麗狂想曲》中有大膽性感戲,着喱士內衣及黑絲,谷胸色誘蕭正楠,展現豪放一面!而喺熱播嘅《伙記辦大事》中,同現實中大佢逾20年嘅馬德鐘有感情線,仲有水底親密戲,而尋日嗰集,陳瀅兩場喊戲就大獲好評,唔少網民讚佢演技大躍進呀!
呢集講到佢點解咁唔鍾意劇中嘅歐陽震華,陳瀅聲淚俱下咁話對方害死佢阿爸、拆散佢頭家,搶走埋阿媽!佢激動爆喊喊到流埋兩行鼻涕,睇到人心都實埋,而馬德鐘就攬實佢安慰!
之後佢哋到沙灘傾偈,而呢場喊戲就好唔同,佢娓娓道來點解咁憎歐陽震華,今次佢層層遞進,講到眼泛淚光、哽咽、再落淚,令人心痛!好多人都留言大讚佢呢兩段戲都做得好好,唔係一味喊,睇到唔同戲份都有唔同嘅喊,叫佢加油繼續努力呀!