楊冪女將祝緒丹出演新劇　有望成為下一個迪麗熱巴

內地藝人楊冪除咗係一線花旦，旗下都有唔少女藝人，之前內地劇《三生三世十里桃花》捧紅咗迪麗熱巴，其實除咗佢之外，當時仲有飾演大奸角玄女嘅祝緒丹，不過當時就紅唔起，仲漸漸被人遺忘，雖然演過《倚天屠龍記》嘅周芷若，但始終未能令人留下深刻印象，更試過長達8個月冇工開，不過最近機會嚟喇！

楊冪重新投放資源喺佢身上，跟22歲的小鮮肉王鶴棣合作《遇龍》，故事講述祝緒丹係一名小丫環流螢，陰差陽錯下救咗小白蛇，原來係龍王化身，由於龍王誤殺流螢嘅女主人夏侯雪，之後三世佢都要守護對方嘅轉生，而流螢亦會以唔同身份跟龍王相遇，直至第四世龍王先可以跟流螢有情人終成眷屬，該劇明顯係跟足《三生三世》系列，至於能唔能夠成功，就要考祝緒丹演技，相信呢粒滄海遺珠好可能成為下一位熱巴。