放棄做「旅」神!吳天兒玩夠係時候還債

2021年05月11日 21:30
東網電視
更多新聞短片
藝人吳天兒(Tiffany)2018年曾參選香港小姐,可惜20強止步,繼而投考無綫藝員訓練班。15歲時,她隻身赴英國讀書,於華威大學畢業,主修商業管理課程。返港後,一心想挑戰自己、擴闊視野的她,由藝人黎瑞恩提名參選港姐,Tiffany與小恩子一樣人美心善,選港姐時,她曾到泰國山區義教小朋友英文,差不多一年時間,曬得一身古銅色膚色,更學了不少泰文。
外表斯文的她其實是文武雙全,精於排球、田徑及劍擊之外,更懂得彈琴、古箏、小提琴及芭蕾舞。於英國讀書時,每逢長假,她就獨個兒孭住背囊周遊列國,25歲的她已去過52個國家,相當誇張,身為基督徒的她,坦言最想去的地方是約旦。Tiffany受訪時說:「通常長假期我都唔會返香港,歐洲又近又平,火車、巴士又好方便,我就孭住背囊周圍去。(邊有咁多錢?)我喺英國有喺快餐店做Part time,我好鍾意喺外地生活。(屋企人唔擔心?)有時瞞住媽咪,歐洲都唔係好危險,一直都好安穩,冇乜大事發生,係試過一次喺斯里蘭卡,有恐怖分子喺首都進行恐怖襲擊,周圍放置炸彈,我媽咪同身邊朋友見到新聞好擔心,不停搵我,好在當時我未去到首都,最終改行程,嗰次真係好震撼,自己都好驚,心諗仲有好多嘢未做,唔想冇咗條命,事後都好感恩!」
經常一個女仔隻身去旅行,問到還試過有甚麼可怕經歷?她指有一次於倫敦搭火車,自己坐下看書時,有一個穿着乾濕褸、拿着皮包的男人走近,問她旁邊的座位有沒有人坐,她開始覺得不對勁,因當時附近還有很多座位,她說:「我坐去第2個車廂時,又有同一把男人聲問我隔籬有冇人坐,我冇望佢,但認得佢件長褸,覺得好驚,即刻走去一個好多人嘅車卡,見佢遠遠咁望住我,最終下一個站到時,我即係狂奔出去!」 她坦言眾多地方之中,她最愛巴黎,覺得當地感覺好浪漫、很有藝術氣氛。
現在覺得玩夠的她,笑言是時候「還債」努力工作,她之前在劇集《玩命真相》中飾演年輕版陳庭欣,因這次是她最多戲份的一次,但經驗不足結果令她累透,她說:「當日拍咗12個鐘,拍完之後我自己去便利店買咗罐啤酒,一次過飲晒後返屋企瞓咗12個鐘,原來拍劇係要好多Energy,仲需要腦力!」講到若入圍港姐,演藝事業可能行得較容易、順利,她說:「我知,可能知名度、角色都有分別,初頭係有少少失落,但係我入咗訓練班都好開心,一班人上堂,學到好多嘢、好充實。」
而Tiffany的偶像是佘詩曼,一說起阿佘她相當興奮,她說:「真係由細睇到大,《十月初五的月光》、《使徒行者》、《延禧攻略》、《公主駕到》,套套我都鍾意,所以我嘅目標係想同佘詩曼合作。」
Profile:
出生日期:11月4日
身高:166cm
體重:50.5kg
嗜好:看書、旅遊、做運動
曾參與劇集及節目:《愛.回家之開心速遞》、《一笑渡凡間》、《把關者們》、《換命真相》、《黯夜守護者》、《姊妹淘》等。
場地:STADIUM
化妝、髮型:Cosette Lee