【得一樣擇偶條件】賴弘國慶幸冇幫阿嬌買樓

堪稱「無死角」嘅鍾欣潼（阿嬌）最近因為身形暴脹再成為焦點，但原來係為咗藝術犧牲！另一邊廂，前夫賴弘國就愈嚟愈瘦，令網民忍不住再將兩人相提並論。賴弘國接受傳媒訪問時透露有抑鬱問題近2年，一度瘦咗12公斤（約26.4磅），導致嘅原因除咗因為再離婚外，更因為當時被指偷食巨胸網紅。重提阿嬌時，佢話到依家都唔知點解被「彈鐘」！

講到當時阿嬌嫁去台灣後想置業時，兩人曾被影到一齊去睇豪宅，但傳出阿嬌被媽咪阻止買樓，賴弘國今時今日講起此事時就大爆其實原本係佢畀錢，而且仲想寫阿嬌名，佢慶幸當時冇畀到首期，否則如今要孭住億元新台幣（幾千萬港元）債務！同阿嬌離婚後，又遇上新冠疫情爆發，愛情事業均觸礁，令佢遇上好大挫折，不過父母最令佢憂心，佢透露兩人都係退休老師，當見到佢連串負聞時，對佢極之失望，但後來都覺得佢辛苦，反過來鼓勵佢唔好在意別人。

阿嬌反口收回「不婚令」，賴弘國都話對感情好認真，如果唔係點會結咁多次婚，仲大方講擇偶條件，笑言只要有穩定工作就可以，因為離過婚，可以揀嘅唔多，有緣就會遇到！