王秀琳重提屈人非禮事件 大爆「男主角」有6次非禮紀錄

2021年05月12日 17:06
東網電視
更多新聞短片
近年鮮有露面嘅王秀琳(Mango)尋晚為網台節目做嘉賓,但好多網民對佢咬住唔放,留言話佢當年屈某人非禮人事。佢就即爆當年慘遭非禮嘅內情,話自己當時只係20出頭,絕對唔會生安白造!
佢又話:「當日係開鬼門關嘅日子,我喺清水灣亞視間廠拍嘢,平時劉以達同佢老婆好錫我,每次都會車我返屋企。但嗰日冇佢戲份,但嗰位演員,唔想開名,走埋嚟話收工一齊去食飯,就一齊去食消夜,嗰次係我第一次接觸呢位『男主角』。食完飯佢話住將軍澳,順路兜埋我,就成個人好快咁擒上我身上,唔係誇張,唔好話發毒誓,總之我唔會講大話,我喺要求佢放我走,佢好大力壓落嚟,我係咁喊,求佢放我走,真係喊到唔敢返屋企,只搵一位好姊妹講,之後又返公司繼續開工,點知位『男主角』當冇事發生,我嗰刻真係好想殺咗佢!」
之後有一位男演員見佢眼腫腫,上前扮慰問,後來先知對方向記者爆料,令呢件事穿煲,其後經理人公司就幫佢舉行記者會講番件事,Mango又話:「點解唔立即報警?因為我驚,但後來我又覺得點解唔報警,我咪去囉,好似係藍田差館,但當時一位Madam錄口供,話嗰個人喺佢哋差館有6次非禮人嘅記錄,我發誓我冇講大話。」