趙學而開騷唔想蝕錢　黎燕珊留髮等開新劇

歌手趙學而、黎燕珊、黎美言、黃建東、柳影虹和樂隊Nowhere Boys等出席髮型屋開幕活動。學而表示與該店髮型師相識於微時，認為疫市開店好應該支持，提到近日演唱會再興旺，她透露原本2019年11月在九龍灣開演唱會，一直拖到現在：「7成半座位平衡唔到開支，因為我只係開2場，希望等到100%入座率。心情好複雜，唔想蝕錢，自己有份投資，但又唔想拖咁耐，凍晒！」

黎燕珊透露將為新劇開工，不過等開工期間更忙：「要攞架車去整，自己又要做Facial。（維修自己？）不過頭髮唔剪得，新劇又要做慘情媽媽，頭髮唔改得，好鍾意呢套劇，會好畀心機做。」

至於同場的柳影虹，以一身粉紅造型現身，充滿活力，無論帽及口罩都襯到絕，細心一看，口罩及帽上面都鑲有水晶鑽石，她透露都是女兒所送的母親節禮物，特別之處是口罩上鑲滿7種不同顏色的水晶鑽石，方便她襯衫。