《愛．回家》扮姜濤？丘梓謙：想向佢致敬

ViuTV的組合MIRROR成員姜濤人氣一時無兩，就連無綫亦頻頻以此作為靈感，繼早前藝人鄧智堅化身「姜蓉」惡搞姜濤後，處境劇《愛‧回家之愛心速遞》最新一集亦出現全新角色，由藝人丘梓謙飾演、疑影射姜濤的人氣偶像蔥頭！劇中講到蔥頭備受萬千寵愛，其純真、善良、可愛一面，更收復兩大惡女「大小姐」林淑敏及「大家姐」滕麗名，雙雙成為其粉絲，而其形象、造型以及經常派心心的小動作，均似足姜濤。

丘梓謙接受東網訪問，承認角色的確有參考韓國偶像，問到會否怕遭姜濤粉絲炮轟，他直言：「都有心理準備，不過呢個角色唔係想醜化佢，而係想向佢致敬，因為佢的確係年輕人偶像成功嘅指標，我自己都好欣賞MIRROR。其實好多謝監製林建祥畀呢個機會我發揮，我本身都好留意韓國K-Pop、內地嘅偶像之類嘅嘢，喺劇裏面做一個偶像角色係一件好開心嘅事，係一個新嘅挑戰，今次同阿滕有啲對手戲，其他係好開心嘅，開頭都有少少驚，因為係一個好好嘅前輩，初頭都驚自己做得唔好影響進度，我第一次比較多戲份喺《愛．回家》，阿滕都好好，有教我點樣做最好，提點我令我好放心。

本身自己係All back比較成熟啲嘅髮型，之前有套劇叫《玩命真相》，監製黃偉聲叫我做一個髮型梳前少少似一啲韓國男團嘅髮型，我開始轉呢個髮型，行韓國風嘅路線，監製喺我社交平台見到我整呢個髮型，又覺得好襯喎，叫我參與呢個角色。監製都叫我留意下韓國嘅男團，動作笑容，我本身都跳開K-POP，有追開嘅男團，係驚自己做得唔夠charming，冧唔到尚善老師同大小姐，呢個壓力會有。」

Solo跳舞

他續指在ViuTV節目《全民造星》播出時，已有留意姜濤的演出，而今次亦有特意研究其舉止動靜，並參考韓團男星的眼神、姿勢，希望能入型入格。他除了換上金髮新造型示人外，曾做過跳舞老師的他亦有幸在劇集大晒舞技：「監製知道我識跳舞，特登加咗場戲畀我Solo跳1分鐘，好開心可以有跳舞嘅角色，係我喺TVB第1次表演跳舞，劇組睇完都話好驚喜原來我識跳舞。」

而監製林建祥回應稱呢場戲兩個月前已拍：「梓謙做得好好，其實有咩唔應該個演員承受，佢都係做好本份，演好個角色！」