隨地掉煙頭？Baby懶理負評掛住滑水：愈摔愈勇

育有一子「小海綿」嘅Angelababy（楊穎）雖然年過30，但喺鎂光燈下無時無刻都展現出天使般容貌，不過私下嘅佢係個煙民！煙齡超過10年嘅佢早年曾分別被影到喺火鍋店、醫院門外等攞藥時吸煙等等，而今次佢喺三亞度假時繼續吞雲吐霧，不過重點係仍疑似隨街掉煙頭到草叢，之後又立即再點另一支煙！其實多年前Baby曾承認會戒煙，但一直以來都失敗。而今次更被網民狠批：「抽煙沒有錯，但亂丟煙蒂就是沒水準了」！

不過Baby懶理負評，今日喺網上晒出滑水片，留言：「又來衝浪了，愈摔愈勇敢！」更自Tag「Angelababy衝浪摔了15次」，佢將唔同時候滑水嘅片組成一條片，一時包到冚一時露出長腿，身形Fit到漏，雖然跌咗好多次落水，但佢都冇放棄，又懶型咁擺Pose，自信十足，網民都大讚佢勇氣可加，亦有粉絲期望佢將滑浪精神放到演技上！而「Angelababy衝浪摔了15次」更登上熱搜榜第1位，號召力認真驚人！