實測流動冷氣機 露營有覺好瞓

20210514
東網電視
更多新聞短片
今次實測Zero Breeze Mark 2流動冷氣機,睇吓戶外用夠唔夠涼快!(方偉堅攝)
夏天又係同陽光玩遊戲的時候,不過香港出名濕熱,戶外野餐或露營對住大大個太陽,都咪話唔辛苦!針對市場需要,近年流動冷氣機興起,最近OTG OnTheGo就入咗款Zero Breeze Mark 2,即刻睇吓佢夠唔夠涼快先!
Zero Breeze Mark 2樣子有點似傳統手抽式大喇叭,銀黑雙色機身上方設有手挽,體積20x10x11吋,淨重7.5kg,連電池重多5.5kg。雖然整體談不上超輕便,但同行Model弱質纖纖也能抽起,可輕鬆在營地內搬動。
有別於市場上的流動冷氣機,它使用時毋須加水或加冰,冷風由內置24V自適應頻率微型壓縮機產生,製冷量達到2300BTU/hr,廠方資料顯示10分鐘內可把氣溫降低10℃。冷氣設有4級強弱及靜音模式,實測在31℃戶外高溫下,開啟最強風力約10分鐘後,冷氣輸出約為22℃,靠近出風口感到十分涼快,若然放在帳篷內,冰凍感更直逼室內冷氣,夜晚保證瞓得着!
此機備有Basic、Plus及Plus Extra三個版本,全部配有240W火牛以供室內取電,後兩者額外附有專用18650鋰電池,一經接駁可戶外使用5小時。提到電池,它的前方提供45W PD及2個USB-A介面,可同時為其他裝置充電,而冷氣出口風環繞LED燈,方便入黑後照明,可謂一物多用!整體而言,此機不失為戶外製冷神器,比一般流動冷氣要涼快得多,惟一分錢一分貨,它的入場費不低,比一些分體式冷氣還要昂貴,有心入手就要準備銀彈了!