亂嗌人做姐姐　張藝興楊紫着同款睡衣水洗都唔清

內地藝人張藝興主持節目《嚮往的生活》第五季，早前佢就為節目考取拖拉機同聯合收割機駕駛證，即時驚為天人，不過最新一集節目就Focus咗去佢嘅緋聞身上，因為今次嘉賓就係佢緋聞女友楊紫，雖然兩個人明顯唔熟，不過佢哋都好大方咁借節目直接否認緋聞。

話雖如此，但眾人去到入夜換睡衣環節，竟然意外發現楊紫同張藝興着住同款睡衣，連同場藝人何炅、黃磊同彭昱暢都笑出聲，張藝興同楊紫就即刻再次澄清冇同對方拍拖，爭住話要換第二件衫瞓，楊紫仲爆料佢哋喺節目入面第一次見面時，張藝興就嗌楊紫做「緋聞女友」，嚇到佢差啲走人，張藝興又多口嗌細過佢嘅楊紫做姐姐，令網友睇完節目都起哄叫二人拍拖。

最好笑係，其中一幕黃磊問到張藝興係咪就嚟30歲，即席催佢係時間要成家立室，仲順口叫佢考慮吓楊紫，二人相差一歲應該幾合適，搞到張藝興尷尬癌發作，仲好鬼怕醜咁話自己連咩係愛都唔知，暗示自己未拍過拖。