「哈比人」黃美棋挑戰《姊妹淘》女神櫈！憑空唔見咗對腳

無綫J2節目《姊妹淘》個個靚女主持獨當一面，不過節目有個令「哈比一族」（嬌小女生）聞風喪膽嘅尷尬位，就係嗰張「女神櫈」！莊思敏、蔡嘉欣、張寶兒呢班高妹當然可以輕鬆駕馭，但身高只有1米60嘅黃美棋，要坐上張「女神櫈」，就真係有啲大整蠱，大家都知啦，小儀都中過招！

話說尋日嗰集《姊妹淘》，由兩位高妹曾淑雅同傅嘉莉訪問美棋BB，齊齊講香水，上得節目，美棋BB就要坐上張「女神櫈」，其實導演已經盡量安排佢坐喺張枱後面，可惜張枱下面就無遮無掩，鏡頭一郁，佢好似冇咗對腳咁，而導演已經盡量影遠鏡遷就，但都畀網民瘋狂Cap圖呀！

美棋BB接受東網訪問，講番今次坐「女神櫈」，佢話：「哈哈，啲Cap圖好搞笑，我覺得反而係整蠱緊佢兩個（指曾淑雅同傅嘉莉），因為佢哋為咗要保持腿部姿勢只可以坐半張櫈，仲要坐咁耐，但係我可以全個pat pat坐哂成張櫈喎！」