面對執着老公點算?單文柔用愛化解 張寶兒認輸

20210515
東網電視
更多新聞短片
未夠30歲已為人妻的單文柔(Phoebe)、張寶兒(Bowie),面對性格執着又有原則的老公陳展鵬及袁偉豪(Ben),就算幾理智、強硬都好,惟有以柔制剛。當Bowie指袁生很有主見,不能「硬碰」時,Phoebe即驚訝謂:「我以為陳生已經係金字塔個頂!」不過,兩位嬌妻樂於挑戰高「峰」,以另類方法軟化老公。
Bowie與Phoebe都是因選港姐而加入娛樂圈,二人因而結識老公Ben及陳展鵬,Phoebe更已為人母,與展鵬育有2歲愛女小豬比。她們都是2016年同屆港姐,選美期間已相當投契、合眼緣,至今仍是一對閨密。
二人性格截然不同,Bowie屬理智型、有主見,更自稱是「大女人」一名,至於Phoebe明顯是感性型,愛得黐纏,開口埋口都「我老公話......」,絕對是可愛人妻。說到展鵬與Ben都屬「大男人」時,Phoebe謂:「我老公話佢唔係大男人!佢話佢對我冇要求㗎!本身我都好有主見,但對住佢某程度輸咗少少!(你兩個老公都好執着!)吓!我覺得我老公已經係金字塔嘅頂端,原來一山還有一山高。」Bowie又謂:「我哋係用軟性方式解決問題,我係好有主見,但袁生更有主見,所以冇得硬碰!(妳輸咗?)係呀!我輸咗,(妳哋脾氣要好好?)要多啲耐性同智慧。」
問到老公平時有否「特別」要求時,Bowie即大爆謂:「佢要我剪短頭髮,都堅持咗半年,我唔想剪,一來習慣咗長髮,二來我頭髮好軟,每日要用好多時間去處理,有次去Staycation,佢又話:『其實你成日影咁多FASHION相,造型可以再特別啲,你把長頭髮實在太普通嘞!』我聽到之後就着火嘞!我係你老婆咁都唔特別?之後就發脾氣剪咗,原本佢想我剪埋齊蔭,但我覺得自己未必HANDLE到,就買咗個假髮夾畀佢睇,(你為咗滿足佢?佢滿意嗎?)佢見到好開心,覺得髮型師滿足佢嘅願望。」
不過,Bowie對Ben都有「軟性」影響,例如Ben不會特別吃supplement(營養補充品),但由細到大Bowie的媽咪都會教她養生,食完雪糕就要飲薑水,現時Ben都受她影響,Bowie語帶得戚謂:「依家佢同朋友傾偈開始會叫人食supplement,同埋佢依家好鍾意飲薑水,冬天仲會泡腳添!」
Phoebe就指老公展鵬向來對她沒太多要求,她謂:「佢唔會直接要求我做一啲嘢,但言語間佢會話:『咦!你咁做會唔會好啲?』佢覺得我人生閱歷比較淺,會提議我學一啲嘢 ,但我自己都有我諗法,經過一輪角力後,我覺得都可以試,係我想佢開心啲,唔一定我認同佢嘅諗法。(咁即係配合佢啦,有冇同展鵬鬧過交?)都有,都係好無聊,小事到一個飲水杯,佢就會講到你嘅性格、人生將來閱歷,會有啲咁嘅情況,佢話我要成長!如果真係好鍾意呢個人就要tune一tune(調校)呢啲位!(咁你真係好鍾意佢喎!)所以咁快就衰喺佢手上!」
Phoebe又指展鵬要她學投資:「佢覺得我對數字冇乜概念,尤其依家要顧家,佢話:『其實妳啲數係咪要識得計呢?』我初頭聽到都有少少嬲!乜你咁話我㗎!但後來我又覺得佢講得啱,因為我有時會多個0、有時又會少個0,睇股票機、計數機時都會發生,我發覺呢件事都好嚴重,老公對呢方面有啲睇法,佢覺得投資同股票係會影響一個人智慧成長同經歷,所有嘢都有成長,甚至煮飯都有成長,所以我都會留意吓!有時我會請教Bowie,因為佢數字方面係叻嘅!」Bowie謂:「我覺得都係!因為要磨合,我哋另一半都比我哋年紀大好多,佢哋經歷、生活習慣唔同,所以大家都要聽對方講嘅嘢,互相讓步。」
Phoebe經常被人問何時生第2胎,而Bowie則被催生,問前者有否後悔這麼早生B時,她開心笑謂:「冇呀!因為小豬比真係好得意,以前我冇諗過生小朋友,我喜歡拍拖,愛情大過天,但後來展鵬畀咗個訊息我,有個家庭、有小朋友老咗都好好,我諗又係幾好喎!我想挑戰吓!(未夠30歲就生冇後悔?)如果嗰個唔係陳展鵬就唔會嘅,但嗰個係陳展鵬OK嘅!」
至於Bowie被問到想不想生時,她理智的分析:「都唔到我選擇!呢啲係上天一個緣分,我覺得呢個世界已經咁多小朋友,我讀地理,呢個世界好多資源太唔夠分,有現成嘅小朋友點解仲要生呢?所以以前我係諗住領養,但結婚後呢個念頭慢慢減退,因為袁生係屋企獨仔,佢哋都係想有小朋友,生一個就太寂寞,要生就生2個,我會生嘅,但依家我未有精神照顧小朋友,我結咗婚、搬咗屋,好多嘢都改變咗,要重新習慣,我覺得要去接納多一個生命需要空間。」跟着Phoebe則謂:「生BB係要衝動嘅!(妳已準備生第2個?)我有個計劃同諗法,想畀多1年、年半時間自己,做好依家嘅先,我仲有好多嘢想做,事實上阿女出世的確影響咗我好多,我都想多2個細佬妹去陪佢!」
此外,雙方都是藝人,面對負面新聞,難免會受影響,Bowie坦言Ben入行比她早得多,所以遇到事情時,她都會企在他位置,了解他為何會有那些想法:「好多時我會明白咗佢先,然後用我自己嘅睇法分析畀佢聽,我同袁生一齊4年,面對事情都成長緊,(佢有冇受你影響而調整?)有㗎!但好多嘢大家互補,要自己消化。」而Phoebe坦言相信展鵬處事方式,知道對方需要的只是一個安全的「窿」:「好多時佢係要搵一個安全嘅地方,需要一個窿,有時佢講嘢我唔係好留心,佢發覺時,我就會交多少少戲,畀多啲反應,有人問2公婆係咪需要做戲,有啲人話要,但如果為對方着想而做,我畀回應你開心,你開心又煩唔到我,幾好呢!」
場地提供:Cucina@馬可孛羅香港酒店