再買新電單車有苦衷？張振朗遊車河曬到燶

藝人張振朗一有時間就會約埋張繼聰玩「男人的浪漫」，即係揸電單車遊車河，張繼聰為咗買新車滿足欲望，成日都會諗埋啲奇怪藉口，例如老婆謝安琪考到車牌，就買架車畀佢但係自己揸等，呢日張振朗除咗喺社交網晒出遊車河嘅相之外，仲解釋佢買車嘅真正原因：「我哋課金買車唔係為自己興趣，係以備不時之需，正所謂機會留畀有準備嘅人呀嘛！」佢仲晒出一張同張繼聰6年前為咗拍《愛．回家》而去上瑜伽堂嘅照片，證明佢買車都係為咗之後工作要拍揸電單車場口時，都可以親身上陣，呢個理由睇落好充足喎！

除咗晒遊車河相，佢仲晒出一張手臂曬燶咗嘅相，大呻除咗手臂變兩截色之外，仲話有啲痛，唔少網民留言提醒佢，玩還玩都要注意搽防曬，唔係好易樂極生悲！