男友觀戰讚精彩!黃智雯咀仔過百次嗌未夠喉
無綫花旦黃智雯與王耀祖及葉榮煌演出的一連四場舞台劇《超自然之戀》完滿結束,連日來獲不少好友撐場的智雯,場地外亦擺滿圈中人送來的花籃。首度演機械人的她除了挑戰劍擊及跳西班牙舞,更與2位男演員上演情慾戲及激咀過百次!
為了今次演出,智雯花了幾個月準備,如今終於完美落幕,心情既開心又不捨,她受訪時表示:「真係放咗好多心機,未試過準備工夫做咁耐,開騷前3星期綵排得好密,每日都遇到挫折,雖然只係2小時演出,但學到好多嘢。個騷反應又幾好,我未夠喉,希望可以開Part 2啦!」
談到與2男激咀連場,智雯笑言最少咀過百次,並自爆男友畀面撐場,大讚她演得出色:「佢好鍾意套劇,事前我冇預告我會點做,但佢睇完都冇提,仲好投入讚個結局添。」又稱休息約1星期便回歸拍劇,屆時與好姊妹胡定欣合作:「同定欣10年冇一齊拍劇,今次我哋演好朋友,會有好多對手戲,好期待。」
王耀祖讚智雯勤力又上心,綵排初期已將劇本背得滾瓜爛熟,即使演出約1分鐘的西班牙舞,她亦甘願於僅餘的一日假期,花6小時練習:「佢真係跳到好瘋狂,所以好想再合作。」至於與智雯激咀連場的葉榮煌,被問可有咀到麻木?他笑言:「唔會,劇本帶動到角色,所以過百次同過千次都係咁做。(拍情慾戲事前有冇溝通?)冇專登講,但大家有默契又OK喎!」