演員被爆臨時改劇本　商天娥：最重要互相尊重

藝人商天娥今日出席家品店開幕，喜愛入廚的她指家中煮食器具全部由她親自挑選：「炆蒸燉煮煎全部都係！（對煮食器具好有要求？）絕對係，當然要適可而止啦，唔係做代言人就全部攞晒返去，最好一機兩煲咁樣，又有得蒸又可以煲湯！（你都鍾意用啲新嘢喎！）當然啦，新同埋型啲嘅嘢啦，最緊要安全。」除注重煮食安全外，她亦非常關注個人健康，她說：「食得多一定要郁吓，我食完飯一定要行，每日最少行半個鐘。」

以往每年都會出埠工作的她，疫情下已兩年沒有離港，她說：「我喺3月同今個月已經推咗2、3個job，因為要隔離，我唔得囉，太耐喇我困唔到咁耐，依家7月同9月嘅工作仲等緊，所以希望大家包括我哋自己都要乖乖哋戴口罩同洗手，返到屋企啲衣物尤其對鞋一定要噴乾淨先入屋囉。」

對於有前無綫編劇爆料指有演員臨時改劇本一事，她表示不知情，但指其實各行各業都有機會面對同樣情況：「我覺得就算有咩改動，最重要係互相尊重吓向最好嘅方向去做，同埋每個人用咩嘅態度去睇對方，如果將件事向好去睇嘅咪好囉，如果向唔好方面去睇嘅就會覺得對方多事囉。」