男友搞驚喜P賀30歲　陳偉琪見「細龍生」失控標淚

藝人陳偉琪（Vicky）早前因負面新聞纏身，最終被無綫送入雪櫃，就連《愛．回家之開心速遞》中「細龍太」一角都冇得再演，雖然喺台慶「解禁」表演豎琴，不過之後都係唔見有乜新工作。今個月21日就踏入「3字頭」嘅Vicky，獲外籍男友為佢舉行神秘生日派對，除咗親朋好友之外，仲搵嚟《愛》劇嘅拍檔湯盈盈、陳浚霆等人拍片祝賀，當Vicky見到劇中嘅「廢柴老公細龍生」鄭世豪喺影片出現，佢即刻變得情緒激動，當鄭世豪話：「戲入面細龍生只愛細龍太，世豪只愛世豪太。」唔知係咪佢太掛住劇組同事嘅關係，情緒有啲失控即時標淚，仲要男友加以安慰。

對於男友嘅安排，Vicky事後亦有發文表示：「Thank you my man for such an amazing birthday surprise！（多謝我的男人為我準備這個美好的生日驚喜！）」明顯十分滿意。