同張振朗神還原《天地豪情》　蔡思貝激似郭藹明獲大讚

演技曾經被受質疑嘅蔡思貝，憑住堅毅不屈嘅性格及多番努力後，最終喺今年嘅《萬千星輝頒獎典禮2020》中，勇奪「最佳女主角」，演技終於獲得肯定！雖然佢貴為視后，但係都冇驕傲自滿，仲上埋《好聲好戲》同舊拍檔張振朗聲演《天地豪情》一場經典對手戲！

思貝扮演郭藹明，而振朗就演張家輝，最終兩人獲得全部共7盞綠燈，非常犀利！主席評判直言對思貝眼前一亮，語氣似、模仿力強，話呢個角色非佢莫屬！而「阿姐」汪明荃亦大讚振朗把聲配合到張家輝，一班專業評判就一致大讚兩人，仲話唔睇畫面真係以為係郭藹明同張家輝，特別係思貝，連個樣都好似本尊！

事後思貝就話初入行時，監製羅永賢都話佢似郭藹明，估唔到依家真係有機會扮佢！佢仲上載兩人喺出演前練習嘅片段，真係非常認真，唔少網民都留言話大讚「真係神還原」、「好似」、「叻叻」！