同馬德鐘水底咀到上水面　陳瀅：絕對難忘

由馬德鐘和陳瀅等主演的無綫劇集《伙記辦大事》，明晚（23日）將播出一連兩集大結局，劇情高潮迭起，戲中「大奸角」馬德鐘獲扮演女友的陳瀅百分百信任，堅信他與殺人案無關，後來馬德鐘教陳瀅浮潛，2人碧波暢泳，期間更情不自禁激咀起來，馬德鐘擁着陳瀅由水底咀到上水面，之後陳瀅再繼續主動咀馬德鐘。這場激吻戲隨即引起網民討論，大讚火辣之餘，更指陳瀅皮膚超白滑，相當吸睛。

談到這場戲，兩位主角都大嘆辛苦，事關拍攝期正值冬天，加上全晚通宵在水底開工，馬德鐘說：「啲水唔係好暖，即使着咗厚衣物都仍然覺得凍，仲要長時間浸喺水底，皮都皺晒。呢場戲拍咗好多嘢，有啲雖然剪咗，但只要觀眾喜歡就好。」陳瀅說：「因為冬天泳池唔開，水質差，我哋又唔可以化妝整頭，所以唔係我最靚嘅一面囉。最難忘係要睜大眼對位，拍攝位置需要好準確，真係搞咗好耐，而呢次係我首次拍水底戲，絕對難忘。」