何超蓮獨見流星好激動　竇驍安慰女友：係你爸爸

賭王三房千金何超蓮自從同內地男星竇驍拍拖之後一直恩愛，早前佢哋仲孖住參與真人騷奉旨放閃，其中一集講到佢哋去到野外露營兼睇流星，一群人夜觀天象時，何超蓮突然見到天上有流星劃破夜空，佢仲好激動咁大叫，不過當眾人跟住佢手指方向去睇時，就乜都睇唔見，搞到佢好失落話：「點解只係得我睇到？」呢個時候竇驍就發揮暖男本色，走埋去女友耳邊細細聲講：「是你的爸爸，所以只有你看到！」何超蓮心情變得激動到眼濕濕仲問：「是嗎，真的嗎？」為咗安撫女友，竇驍除咗幫手抹眼淚及抱抱之外，仲輕吻對方臉龐。唔少網民大讚竇驍錫女友之餘又識氹對方，真係好男友嘅典範。