【爆汗減肥法】譚嘉儀日日堅持做30分鐘

歌手譚嘉儀出道時有肉地，不過近年似乎縮水了幾個碼，原來花了3年時間積極收身減磅，由最豐滿的110磅減至現時94磅，身形弗爆！滿有心得的她笑指只要有恒心，所有事情定能達標，談到最有效的減肥法，她說：「我每日開住電視喺網上平台搵啲運動片，喺瑜伽墊上跟住條片喪做30分鐘，真係爆汗，有時會加埋Sit Up，總共做1小時，做完成Set真係散晒，但出完成身汗好爽。」如是者堅持了3年，嘉儀終與肥嘟嘟身形講再見。

成功減磅後，便要進入操身形階段，她分享一個小貼士：「每次做平板支撐1分鐘，慢慢就練到馬甲線同肌肉出嚟，當然運動之餘，飲食都要注意，少食澱粉質，多食生果同菜。雖然我都多食肉，但要減磅就淨係食烚菜同雞胸，2星期已經收晒身，之後畀1日獎勵咩都食，以前試過好多錯嘅方法，好似做完運動食雪糕，結果等同冇做一樣，大家千祈唔好學。」