嚴打選秀節目！傳《中國好聲音》《創造營》停辦

內地歌唱節目《中國好聲音》從2016年播出至今，一直廣受觀眾喜愛，當中更捧紅一眾歌手好似張碧晨、周深、吉克雋逸等，仲一早官宣咗周杰倫繼續做導師，不過近日就有壞消息，網上瘋傳《中國好聲音》停止2021年所有海選活動，更有疑似正式通知書流出，係《中國好聲音》節目單位向全國各區域合作對象通報，內容更直接寫道：「接國家有關部門，要求停止一切綜藝節目的海選活動，《中國好聲音》節目組堅決擁護國家相關部門決定，即日起，停止2021年《中國好聲音》全國所有海選活動。」暫未知內容真偽，節目組亦未有正式回應。

除此之外，萬眾期待嘅女團選秀《創造營》第5季亦傳出選手海選面試暫停，製作節目嘅影音平台未來會改製作舞蹈、音樂、電競等競演節目。

有指源於今年選秀節目《青春有你3》投票機制導致「倒奶風波」，中國演出行業協會發出新規定，禁止藝人收受粉絲集資財物的行為，違規者將會面對相關協會「聯合抵制」等懲戒措施，即嚇得多個選秀節目急急煞停。