周杰倫演唱會拖足2年！主辦方打擊假飛考慮報警

台灣天王周杰倫（周董）香港演唱會因疫情關係，時間一改再改，今日（26日）主辦方寶輝娛樂老闆謝嘉豪召開記者會，指對落實8月舉行抱有信心，惟開始出現假飛情況令他們關注：「有粉絲攞住啲冇座號嘅飛嚟要求替換，話到手時已經係咁，上面明顯用化學劑抹過冇咗層面，我哋已知會通報。（報警？）呢個係考慮方法之一。」

由於舉行場地由主題樂園改往中環海濱，每場坐位少7千多個，他明白搶飛情況嚴重，呼籲歌迷小心，不要誤墮陷阱。目前暫定6場演唱會，至於加場問題，他坦言會與周董商量，但明白夏天舉行演唱會相當辛苦。談到台灣疫情，他謂：「呢樣我控制唔到，都會緊密留意。（周董嚟要隔離21日喎。）呢個預咗，佢會帶台灣樂隊嚟，起碼百幾人一齊。」

談到粉絲苦候兩年仍未有騷睇，謝嘉豪推出措施回餽：「我哋同啲美容商、大商場等協議，憑票尾去消費有回贈，另外周董送出兩套限量版黑膠碟抽獎，兩套都絕版，市面炒到幾萬蚊。」他又指每次宣布延期，主辦方都蝕數百萬：「總之公司會盡力而為，希望帶優質演唱會畀大家。」