吳業坤晒11年前「巨聲幫2」舊照　黑實胡鴻鈞網友認唔到

歌手吳業坤、胡鴻鈞及謝東閔2010年參加無綫選秀節目《超級巨聲2》入行，分別以第5名、冠軍及第4名姿態正式出道，三人因此由勁敵成為好友。轉眼間已過11年，吳業坤喺社交網上載當年成班「巨聲幫」去打邊爐嘅照片，與眾同樂，留言謂：「想當年仲未識飲酒（我仲飲緊忌廉）」原來因為出席《超聲2》其中參賽者吳筠怡大學畢業典禮，故突然翻開舊照片懷緬，並自嘲：「依家去緊吳筠怡個大學畢業典禮，好老呀救命！」

相中見吳業坤同謝東閔樣貌青澀、髮型Old School，拎起啤酒同大家乾杯似足學生謝師宴咁青春，而其中一張大合照，見到胡鴻鈞仲伸咗個頭出嚟望鏡頭影相，相中嘅佢黑黑實實，轉變甚大，加上相片模糊，難怪網友話唔睇真啲都認佢唔到呀！