賴冠霖90度鞠躬道歉　舒淇張翰被插大支嘢恰新人

影后舒淇近排同14位大陸名人拍攝內地真人騷《五十公里桃花塢》，不過節目一出即成為大眾話題，早幾日時尚達人蘇芒就被質疑1日飯錢650蚊都嫌少，今次就到舒淇及張翰等被插耍大牌！

節目指眾人陸續抵達北京桃花塢，第一隊入駐嘅藝人係郭麒麟同周也，舒淇緊接住到場，二人就急急腳上前打招呼同幫手搬行李，點知舒淇兩手揈揈直接行開，之後到賴冠霖現身，佢就同執緊行李嘅郭麒麟傾偈，點知遠處行過嚟嘅舒淇黑晒面，一開口就話賴冠霖冇禮貌：「沒禮貌，你應該先跟我打招呼！」嚇到佢即時90度鞠躬道歉。

除咗舒淇，大陸藝人張翰亦同樣被指恰新人，佢到達桃花塢時，新人歌手彭楚粵已經一早到場，佢一見到對方就即時打招呼：「哥好，小粵！」並點頭示好，不過張翰只係瞄咗對方一眼，連腳步都冇停低，敷衍講咗句「你好」就推行李繞過，完全無視對方，尷尬又意外嘅彭楚粵只好企喺原地望住張翰背影。