激罕！黃偉文「出賣」彭羚林海峰世紀合照

封咪已久嘅歌手彭羚，同林海峰結婚23年一直愛得低調，咁耐以嚟都冇喺社交網放閃！不過佢哋就畀好友填詞人黃偉文「出賣」，尋晚（28日）喺社交網晒出林氏夫婦世紀合照。原來黃偉文上周五（21日）52歲牛一，所以成就呢張咁珍貴嘅相，佢留言：「生日嘅第二張Trump Card（王牌）就係：動用呢個黃金機會，引／逼嗰啲成日都唔想出夜街嘅朋友破例，例如呢Pair！」網民見到呢個畫面都話回憶返晒嚟，仲乘勢留言，叫林海峰放老婆出嚟唱番歌，大家都好想聽番《小玩意》呢啲高質嘅歌！