速食18歲學生妹　吳亦凡「後宮」又添新女

曾係韓國男團EXO成員嘅內地流量男星吳亦凡近日多戀事，除咗被爆戲院包場密會18歲長髮學生妹，戲院內談情至離開嘅CCTV過程被公開，吳亦凡工作室即起訴涉事戲院侵犯藝人私隱，但網友隨後續爆料指原來二人相識1個月左右就已經分手，極速玩完。

唔好以為咁就完，網友指佢依家嘅女朋友係短視頻平台顏值網紅，個女仔單眼皮兼打扮清純，即刻令網友「矛頭」直指係象韻潔。網友更言之鑿鑿咁指吳亦凡當時知道象韻潔有男朋友，仍然同對方發展感情，而鑑於自己曾被前女友拎出短訊錄音及偷拍等，有指佢今次同象韻潔拍拖就再冇玩視像見面或錄音，只得網友晒出嘅幾張聊天紀錄當「證據」。

不過尋晚（28日），象韻潔發文否認同吳亦凡戀情：「啥跟啥呀，傳聞不可信，我單身，謝謝。」不過佢又快手將闢謠發文刪走。而吳亦凡就懶理傳聞，繼續力Sell自己新歌。