趁火打劫！《黑澀會》小薰被網絡詐騙戶口得番100蚊

台灣疫情不退，每日維持住3位數確診數字，唔少藝人都直認工作量大減，微薄收入硬撐生活，點知節目《我愛黑澀會》出身嘅台灣藝人小薰仲慘，尋晚（28日）竟然遇上網絡詐騙，直接將私己錢呃到得番378元新台幣（約106元港幣），簡直就係百上加斤！

佢尋晚一開Live就自爆被詐騙，人先啱啱由警局報案返屋企，佢續分享被詐騙經過，佢話自己早排買6、7支洗頭水同沐浴乳，尋晚突然收到電話，對方自稱係廠商，因為員工將標籤貼錯，導致佢買嘢嘅網址變成經銷商專用，如果唔修正，就會每個月固定喺佢帳戶自動扣款，嚇到佢心都慌埋。

對方之後就話銀行會再打過去畀佢，3分鐘後小薰收到「銀行」電話，對完資料後被要求匯款，匯完錢仲照對方要求先關機一小時，最後等極啲錢都一去冇回頭，搞到佢依家戶口只剩下378元新台幣，即刻就趕去報警，佢仲無奈話：「現在說起來覺得我自己真的是好蠢喔！但當下真的是傻傻的欸…疫情期間，沒賺錢就算了，這也算是個劫吧！」不過最心痛係警察同佢講搵番啲錢嘅機會好渺茫，令小薰哭笑不得：「那我該何去何從……」