周柏豪着唔落結婚套西裝　中碼變做加大碼！

歌手周柏豪和JW（王灝兒）到將軍澳電視城為慈善騷拜神，柏豪表示會有幾part演出，除了solo環節，合唱歌亦要排舞，又會與《聲夢傳奇》其他導師及李克勤表演。柏豪自爆近日為將拍新劇《旁觀者》減了7磅：「呢半年我有啲褲扣唔到，所以狂食好清同做運動，都有啲成效。」減了21磅的JW即笑言：「你唔係受到我嘅啟發嘛？（過幾招畀佢？）使乜，佢keep fit咁叻，不過我係因為疫情太放肆，依家拍劇所以就瘦番晒，好多之前衫褲都着得番，之前着唔到嗰啲我會留番，希望可以有日着番，依家着緊呢條牛仔褲上年都扣唔到，所以我就keep番，等我有一日着得到。」

柏豪又笑言：「上星期執屋，搵番結婚套西裝，點知着唔到，因為我練大隻咗同埋又肥咗，原來2016年嗰陣咁瘦，由中碼變做加大碼，但我都有keep番套西裝，等之後着到。」

冇聽過無綫開新版《倚天屠龍記》

近日網上流傳無綫翻拍《倚天屠龍記》，有意搵一班歌手演出這套經典武俠劇，有傳周柏豪會飾演張無忌的爸爸張翠山，連詩雅飾演張翠山妻子殷素素，林穎彤會飾演楊不悔。但柏豪表示完全冇聽聞過此事，又笑言唔介意做爸爸角色：「我做金毛獅王都得㗎，咁我真係爸爸嚟，做嘢最緊要，但真係冇聽過呢件事。」