【歌王X視后】同蔡思貝組隊跳唱?胡鴻鈞:驚眼球爆!

20210530
東網電視
更多新聞短片
歌手胡鴻鈞(Hubert)正為無綫新劇《愛上我的衰神》趕工,但都不忘抽時間宣傳新歌《整親》,仲親自邀請樂隊Dear Jane玩Crossover互唱新歌!近日佢先Post咗其中一條片︰「同Dear Jane識咗好耐,今次係第2次合作,想試吓將首新歌加啲Band Sound元素,應該幾正!(自薦做Dear Jane第5位成員?)我有話佢哋爭個Keyboard手,但佢哋話我自己一個好似仲有個人風格…(被婉拒好Hurt?)睇怕我要再努力啲,哈哈!但我覺得歌手之間有交流係好好玩,一路都想再有合作。」
講到想組成組合,提議他可跟視后兼緋聞女友蔡思貝組隊主攻跳唱,因為之前思貝曾跳唱過其歌《到此一遊》,可謂「經驗」豐富,「默契」十足,若然成功「結合」就係歌王加視后的最強組合,同時又可抽時間「拍拖」,可謂一舉多得!Hubert聽到先扮傻反問「佢跳舞咩?」然後笑話︰「以我所知佢啱啱入咗劇組,大家都忙,跳舞真係唔好亂嚟,觀眾嘅眼球係有Quota,長期去攻擊大家個眼球會有爆煲嘅一日,就好似我之前出咗好多條跳舞片,都係挑戰緊大家條底線,我Feel到就嚟好似過咗條線,就無謂再刺激大家,等回落番先啦!(即係有機會?)咩都有可能嘅!但自覺同跳唱仲有一大段距離,不過我會繼續去嘗試、進步,除咗唱情歌,都希望有另一面畀大家見到。」