組合MIRROR人氣王姜濤早前突然於社交網上載「厭世文」放負，指對所有事件感厭倦，即時嚇壞一眾粉絲，而經理人花姐亦立即解畫，澄清佢只係身體不適需休息數天。事隔11日，姜濤終於更新社交網，佢晒出連環4連拍，並留言報平安指：「假期結束，沒事了。抱歉讓大家擔心了。」

叉足電嘅佢仲心情大靚，頻頻自拍趣怪短片，大玩濾鏡特效變身「外星人」，仲咪嘴唱兩位隊友呂爵安（Edan）及陳卓賢（Ian）嘅歌曲，相當搞笑。粉絲們對佢「回歸」感興奮，紛紛留言送上支持。