網紅P圖自稱係女友抽水　吳亦凡告爆對方要求賠償

內地流量男星吳亦凡近期陷入桃色風波，日前佢包場同內地網紅「小怡同學」陳紫怡睇戲被斷正，之後竟然有多位網紅及少女出面聲稱自己「被小三」，紛紛晒出對話截圖，以「證明」自己同吳亦凡拍過拖，當中網紅宋宋璨亦加入「聲討大會」，晒出對話截圖並留言：「吳亦凡哥哥真多妹妹。」

正當大家都興奮食花生之際，宋宋璨忽然發道歉文，指自己自稱同吳亦凡拍過拖係吹水，啲截圖更加係P圖，冇諗過會引發咁多關注，並公開向吳亦凡及其粉絲道歉，稱自己唔應該「玩梗過度」：「實在是慌了，只能刪掉微博，真的抱歉昨晚和朋友玩梗過度，引發大家的誤會。我的玩梗過度導致吳亦凡先生名譽受損，也向吳亦凡先生及他的粉絲道歉。」

無辜被屈嘅吳亦凡，更嬲爆委託律師事務所起訴造謠者，稱部分別有用心者存在惡意PS（修圖）相關聊天記錄截圖行為，係混淆視聽及抹黑，更請求法院判令被告公開賠禮道歉、賠償精神損害撫慰金及相關維權成本等。