240億點使？黃子韜娛樂公司超豪總部曝光

韓國男團EXO前中國成員黃子韜（Tao）自2015年退團解約返內地發展後，一直有富爸爸黃忠東大力支持，但去年9月黃爸爸病逝，留下逾200億人民幣（約240億港元）遺產畀黃子韜，令佢成為百億富豪。

雖然黃子韜成日晒私人飛機、名車、名錶炫富，但其實佢一啲都唔敗家，佢喺海南島更成立娛樂公司，雖然總部依家仲裝修緊，但黃子韜已急不及待喺社交網晒裝修進度嘅相，並留言：「加油，還差百分之40完工！」

只見佢間公司大得誇張，單係個大堂目測已過萬呎，裝修簡約又摩登，而佢聘請嘅員工大部分都係後生仔女，充滿活力。唔少網民見佢出Post後即引起熱議，有人仲問佢請唔請茶水、掃地，一定大把人爭筍工，而「#黃子韜晒新公司裝修照」更火速登上熱搜，爭住睇佢新公司有幾大同誇張。