陳積榮安息禮　孫慧雪8月舉行相展為好友圓夢

前無綫藝員陳積榮（Jeff）早前因肺癌病逝，終年38歲，今日下午於尖沙咀聖安德烈堂舉行追思會及安息禮拜，儀式完成後靈柩將前往歌連臣角火葬場進行火化。Jeff的治喪委員會成員包括其大學同學駱振偉、容羨媛、無綫藝員訓練班同學孫慧雪、謝珊珊、鄧永健、關浩揚一齊接受訪問。

孫慧雪指與Jeff由訓練班開始已經相識16年，大家正努力籌備希望完成他生前已經寫好的劇本，有關訓練班的電影作品，另外，8月份亦會為他舉辦相展，她說：「希望將佢嘅正能量帶畀大家，佢之前講過無論今次畢唔畢到業，都希望所有患病嘅朋友唔好放棄，呢段時間佢感覺到大家對佢嘅愛。」

駱振偉指與Jeff是大學同學，兩人的回憶並不是工作，回憶是一起打麻雀、玩耍，他語帶哽咽說：「睇番啲舊相，都係開心嘅回憶，睇相你一定會見到佢，因為佢係一個充滿能量嘅人，大家會好懷念佢，佢永遠係照顧人哋嘅感受，多過照顧自己感受嘅人，佢打呢場仗，就係希望其他打緊仗嘅人得到支持。」