陳瀅拍古裝瘦晒　唔畀周嘉洛瘦過自己！

藝人陳瀅最近忙於拍攝古裝劇《痞子殿下》，雖然忙歸忙，不過她亦不忘更新社交網站，她放了3張靚女相冧網友，相中她身穿露肩裝，並擺出不同表情，網友紛紛留言大叫女神，又讚她可愛。

相中陳瀅臉尖尖，似乎清減不少，她解釋：「因為拍劇辛苦，天氣熱又多動作戲，所以就瘦咗，所以咪覺得影出嚟輯相好靚囉！雖然辛苦，但拍攝過程好享受，因為拍得好開心，同每個演員都好傾得埋，大家好玩得，而且呢套係喜劇，所以成個氣氛好好，我平時拍劇好少忍唔到笑，但呢套真係好多。」

她又指不止自己減磅，同劇個個演員都瘦了不少：「大家好似鬥瘦，不過唔係專登，因為大家唔夠瞓，天氣又熱，JW（王灝兒）好誇張，佢減咗21磅，周嘉洛都減得誇張，搞到我都要減得好誇張，因為我同佢企埋一齊，我唔容許佢瘦過我，總之大家一齊瘦，呢個都係意外收獲。」