林允做美容療程白老鼠　素顏上陣痛到標眼水

「世界上沒有醜女人，只有懶女人」呢句說話，絕對係「星女郎」林允嘅人生座右銘，佢今年只不過係25歲之嘛，仲係天生麗質，塊面又白又滑零毛孔，不過佢就醉心美容，覺得保青春同買保險一樣，愈早做愈有着數，所以繼之前打「水光槍」美肌，搞到成面針窿，睇都驚驚後，今次佢又走去挑戰另一項美容療程，內地稱為「熱瑪吉」，而香港就叫「Thermage」嘅療程，做完後聲稱可以回復最佳狀態。

早前林允就係社交網分享試做「Thermage」話想減少啲眼紋，瞓喺床上素顏嘅佢話第一次做「熱瑪吉」實在係太痛啦，雖然她只做眼部，但係都痛到差啲標眼水，要唱住歌分散注意力，但為咗靚靚，佢都堅持、堅持再堅持。有網民就話做女明星真係唔容易，為咗個靚樣，又要大膽又都忍受痛楚。不過另有網民就質疑佢博上熱搜，話佢只不過25歲，使乜咁早做緊膚療程，又覺得佢做咗同冇做都分別唔大，覺得因為內地呢期興呢個療程，所以先試做博網民關注。