期待第5次拍拖!陳瀅收張子丰做「兵」

20210610
東網電視
更多新聞短片
自爆曾拍過4次拖嘅宅男女神陳瀅,早前暗示最後一個男友正係賭王四房公子何猷亨,依家變為單身,仍等待第5個出現。女神單身,機會嚟喇,據知佢依家大把人追,只係睇啱唔啱佢心水。
有傳唱片公司太子爺張子丰(Fred) 對陳瀅嗒糖,日前陳瀅相約好姊妹何雁詩、賴慰玲、Cheronna等去High Tea,Fred都有同行,期間Fred更自動打開背囊,幫陳瀅袋隨身物品,被指做「兵」,以Fred嘅家底,加上如此獻殷勤,唔知佢哋關係會唔會更進一步!
陳瀅今日喺南丫島拍攝,得知傳聞後有啲不快,唔想回應,佢同Fred屬同一經理人,經理人已經叫咗Fred回應,自己唔想講太多!而據知,當日陳瀅只係去慶祝經理人生日,冇叫過男方拎袋,而嗰個手袋係何雁詩!