港姐面試:「母女」參選?騎呢組合孖住行

20210610
東網電視
更多新聞短片
港姐今日舉行首輪面試,其中一位年紀最細嘅佳麗Ukei只有17歲,認真卜卜脆,不過同佢同行嘅佳麗Pamela就大過佢整整10年,加上Pamela個樣幾老成,兩個拍埋,十足兩母女,似陪個女面試多過自己面試。
但27歲Pamela見到記者就好自信咁擺晒甫士,佢話自己做物業估價嘅工作,參賽係為咗挑戰自己,因為今年係最後一年合資格參選。問佢覺唔覺得自己靚?佢就好老實咁答:「普通!」至於Ukei的社交帳戶只見到有13張相,其中有戴上兔耳仔,着水手裝的可愛學生look相,又有着住露腰小背心嘟嘴賣萌,以及低胸花花短裙露長腿,真係青春無敵!
林欣瑜似去返學
另一個同樣係17歲嘅佳麗林欣瑜,佢着住條白色裙仔但就孭住個書包,十足學生妹,個樣勁樸素,佢話自己讀經濟剛剛畢業,算係學霸,對自己個樣有信心喎!
另外,今年都有唔少北方佳麗嚟參賽,24歲嘅Lily來自哈爾濱,職業係教普通話,由樣貌談吐到衣着都滲出濃濃鄉味,身穿粉紫色透視裙嘅佢粗腰加上包包臉,仲未減好肥就嚟參選,勇氣可加。
同樣係包包臉兼未修身嘅佳麗Alice,今年24歲,身穿花花裙,喺英國讀會計,現職核數師,身為專業人士嘅佢見到記者緊張到想喊咁,問佢點解要參選?佢話:「屋企人想,我都想體驗,好緊張!(要修身?)努力緊。」
最騎呢係連講廣東話都唔識嘅佳麗都嚟參選,講英文又唔多掂,雞同鴨講咁,不過佢話自己係喺香港出世㗎,來自東涌,但全程唔肯透露自己嘅名,由哥哥陪同面試。而24歲的佳麗余曉蕙身形苗條,身穿短褲騷長腿,不過腳上勁多瘀痕,反而令人大打折扣。